الأخ الرائع / أسامة
يديك العافية على هذا البوست الجميل الذي يعرفنا الكثير عن قرى سوداننا الحبيب .
أنا قريتي هي (الجُُـبَارَاب) من جُبارة وليس (الجَابْْراب) من جَابر عشان ما تلخبتو الكيمان 
و الجباراب قرية من قرى ريفي الدامر ، وحالياً حي من أحياء مدينة الدامر ، وطبعاً الدامر مافيكم زول ما بعرفه ، عاصمة الشمال كله لأكثر من قرن وحالياً عاصمة ولاية نهر النيل . و الجابراب دي غرب النيل .
أها الجباراب دي بتبعد من نص الدامر حوالي 10 كيلو باتجاه الجنوب ، يعني الدامر المدينة ، بعدها الشاعديناب ، بعدها الحديبة ، بعدها الموسياب ، بعدها الجباراب ، بعدها الحصايا ، والقرى دي كلها مابفصل بينها إلا مئات الأمتار بس ، ومعظم سكانها أهل بعض .
أها سكانها جعليين صرررر ، شاعديناب أمهم بت أعم أبوهم ، ومافي وسطهم زول غير جعلي ، وكلهم أهل بعض يعني زول غريب واحد ما فيهم .
وهي راقدة فوق الضفة الشرقية للنيل تب ، وخدراااا خُدرةً غباش مافيها إلا الحيط والشوارع ، يعني الزراعة حايطاها من الجهات الأربعة .
وأهلها مزارعين وتجار وموظفين كبار ، وفيها مشروع زراعي كبير مساهمين فيه كل الناس وأي زول عنده فيه حواشة .
وفيها مدارس ولاد وبنات ، أساس وثانوي ، وخلاوي قرآن ، ونادي رياضي ، ومركز صحي ، وكهربا وتلفونات ، وصهاريج ، وجزارات وبقالات وكناتين ، وأي حاجة ضرورية .
وطبعا ماعندنا نقطة شرطة لأنه نحن مابتاعين مشاكل
وسوقنا هو سوق الدامر ، طبعا أكبر سوق في الشمال ، والخدار الفي السوق أكتر من نصه من عندنا .
أها الشي الماقلتو ليكم نحن أهل الحنا البتحننبيها نسوان السودان ديل جت ، وطبعا معانا الموسياب و الحصايا ، لكن نحن أسياده وأول ناس زرعناها ، وأظنكم سمعتو بي حنة النجمة حنة الدامر الأصلية ، دي حقتنا عديل ، وحنة التاج ذاتها سيدها بشتريها مننا .
ومع الحنا بنزرع البصل والقمح والفول المصري والموالح والخدارات وشوية تمر ، مع انه نخلنا كتير خلاس لكن معظمه جاو .
وأنا اتولدت فيها وقضيت فيها طفولتي بس للأسف تاني ماعشت فيها وبقيت عربي جزيرة ، يعني جعلى تايوان ، وحاليا مستوطن في ام درمان ، لكن بزوره طوالي لأنه الأسرة مستقرة فيها .
وعشان مستعجل باقي الكلام بجي اتمو ليكم مرة تانية كان الله حيانا مامتنا .
في امان الله .. بابكررحمة الله جارة ت 0121911477
الإثنين سبتمبر 24, 2012 10:43 am من طرف علي محمد أحمد فضل السيد
Ahlamontada 
موضوع: تعريف اسامة للمنطقة في موقع النيلين 
